Ардын хувьсгал, Атарчдын өлгий “Алтан гадас одонт” Түшиг нутгаараа овоглон тив дэлхий, улс орныхоо өнцөг булан бүрд ажиллаж амьдарч байгаа Түшигчүүд, энэ нутаг устай ажил амьдралаараа холбоотой нийт иргэддээ болон нутгийн өөрөө удирдах ёсыг төлөвшүүлэх их үйлсэд ажиллаж байсан удирдлагууд, үе үеийн төлөөлөгчид, ажлын албаныхан, иргэд та бүхэндээ Монгол Улсад нутгийн удирдлагын шинэ тогтолцоо үүсч хөгжсөний түүхт 32 жил, Атар газар эзэмшсэний түүхт 65 жил, Түшиг сумын түүхт 100 жилийн ойн баярын мэндийг дэвшүүлэн мэндчилье.

Тэртээ 1992 оноос нутгийн өөрөө удирдах ёс Монгол Улсын Үндсэн хуулиар баталгаажиж, орон нутагт Иргэдийн Төлөөлөгчдийн Хурал, Иргэдийн Нийтийн Хурлууд бий болсон байдаг. Иргэдийн Төлөөлөгчдийн Хурал нь орон нутгийн иргэдийн эрх ашиг, хүсэл сонирхлыг илэрхийлж, сумын эдийн засаг, нийгмийн хөгжлийг тодорхойлон, түүнийг хэрэгжүүлэхэд сумын Засаг дарга, түүний Тамгын газартай нягт хамтран ажиллаж ирсэн.

Сумын иргэдийн Төлөөлөгчдийн Хурлын энэхүү танилцуулга нь Түшиг сумын Иргэдийн Төлөөлөгчдийн Хурлын түүхэн замнал болон орон нутгийн сонгуулиар ард иргэдийн итгэлийг хүлээж Төлөөлөгчөөр сонгогдон ажиллаж байсан болон одоо ажиллаж буй бүрэлдэхүүн, хурлын хороод, ИТХ-ын Зөвлөл, ажлын албаны мэдээллийг хүргэж байна.

Сум орон нутгийнхаа хөгжил цэцэглэлтэд үнэтэй хувь нэмэр оруулж ирсэн Иргэдийн Төлөөлөгчдийн Хурлын үе үеийн дарга, төлөөлөгч, төр төсвийн байгууллагын үе үеийн ажилтнууд болон иргэддээ чинь сэтгэлийн талархал илэрхийлье.

МОНГОЛ ТӨРИЙН ӨЛМИЙ БАТ, МЭЛМИЙ ТУНГАЛАГ

ТӨРИЙН ТҮШЭЭДИЙН УХААН ХУРЦ, СЭТГЭЛ УУЖИМ

АРД ТҮМНИЙ ЗАЯА ТЭГШ, БОДОЛ НЬ ЗӨВ

ЭХ НУТГИЙН МИНЬ ТЭНГЭР НЬ ЦЭЛМЭГ

ТӨРИЙН СҮЛДЭТ БАГАНА НЬ БАТ ОРШИХ БОЛТУГАЙ.

ТҮШИГ СУМЫН ИРГЭДИЙН ТӨЛӨӨЛӨГЧДИЙН ХУРЛЫН ДАРГА  Ц. БАТТУЛГА